About Me

My photo
සමහර දේවල් නැති වුණ.....සමහර දේවල් ගොඩක් අයට වඩා ඕනෙවටත් වැඩියෙන් ලැබුණ.............. ජීවිතේ බලාපොරොත්තු ගොඩක් තියෙන............. ජීවිතේ විඳින්න කැමති කොල්ලෙක්............

කොල්ලගේ යාලුවෝ......

Thursday, February 23, 2012

බීපු ඩබල




මේක නම් මම කලින් කාගෙන් හරි අහපු කතාවක්. මරු කතාව නිසා දාන්න කියල හිතුනා

ඔන්න දවසක් රෑ බාර් එකෙන් එලියට ආවලු කන් පාත් වෙලා සාක්කු වලත් පතුලටම බැහැපු ඩබලක්. දෙන්න එලියට ඇවිත් ටික වෙලාවක් වට පිට බල බල ඉඳලා පයින්ම එක පැත්තකට ගියාලු.

ටික දුරක් ගිහින් එක පොරක් අනිත් පොරට කියනවලු මෙහෙම

1 පොර - ආ මචං. ඔන්න අපේ ගෙවල් ලඟටනම් ආවා. උඹට තනියම උඹේ දිහාට යන්න පුලුවන් නේද??

2 පොර - පිස්සුද යකෝ මේ මගේ ගෙදර. උඹට තනියම උඹේ ගෙදරට යන්න පුලුවන්ද??

1 පොර - උඹ බීල වැඩි වෙලා. මේ මගෙ ගෙදර යකෝ. මායි හාමිනෙයි පුතයි විතරයි මෙහෙ ඉන්නෙ. උඹ කොහෙ ඉන්නද මේ ගෙදර??

2 පොර - මේ මේ පිස්සු කෙලින්න ලෑස්ති වෙන්න එපා… මේ මගෙ ගෙදර. මායි අම්මයි තාත්තයි විතරයි ඉන්නෙ මගෙ ගෙදර.

ඔන්න ඔහොම පැය කාලක් විතර දෙන්න වාද කර කර ඉන්නවලු. ඊට පස්සෙ.

1 පොර - හා හා වරෙන් අපි දොරට තට්ටු කරල අහමු මේ කාගෙ ගෙදරද කියලා

ඔන්න දොරට ටික වෙලාවක් තට්ටු කරාම ගෑණු කෙනෙක් දොර ඇරියලු.

2 පොර - සොරි ඈ කරදර කරාට මේ රෑ. අපිට කියන්න මේ කාගෙ ගෙදරද කියලා

කාන්තාව - හිටු කොස්ස අරන් එනකම් මම. අදත් තාත්තයි පුතයි දෙන්න සිහි නැති වෙන්න බීල මෙතන ඇවිත් නේද මට වද දෙන්න.


Thursday, February 16, 2012

ඕං පණහයි





නිකමට වගේ බලද්දි දැකපු එක දෙයක් නිසා පුංචි පහේ සතුටක් හිතට ආවා.....


මං පෝස්ට් පණහක් ලියල නොවැ. ඒ මදිවට ෆලෝවර්ස්ල 75 දෙනෙකුත් එක්කහු වෙලා.


සන්තෝසයි...... මගේ ගමනනං ඉතිං හිමිං ඕං..

තවත් එක් මානවකයෙක් ....

පළවෙනි කොටහ බලපු නැති ඈයො එතනට ගිහිං ආවනං මේක අන්ඩර දෙමල වෙන එකක් නෑ මයෙ හිතේ...

එදා ඉඳන් සමරවීරගෙ දින චරියාව උනේ පීටර් මුදලාලිගෙ කාර්යාලය උදේම ඇරලා දුරකතනෙන් එක ඇනවුම් බාර ගැනීම සහ ඒවා වාඩියෙන් ලෑස්ති වෙන දවස් අදාල ආයතන වලට දැනුම් දෙන එකයි. ඒ වගේම තමුන්ට මේ අවස්ථාව දුන්නු මුදලාලිට තමුන්ගෙ උපරිමෙන් කරනව කියල හිතාගෙන හැම ගනු දෙනුවක්ම බොහොම පිලිවෙලට ගිණුම්ගත කරපු සමරවීරගෙ අවංක කම දැක්ක මුදලාලි කල් යනකොට සමරවීරට සැලකුවෙ තමුන්ගෙම නෑයෙකුට වගේ. ඔය අතරෙ තමයි පීටර් මුදලාලිගෙ තරුණ දුව සමරවීරගෙ ඇහැට වැටෙන්නෙ. ඉන් පස්සෙ අනික් හැම ආදර කතාවක් වගේම ලස්සනට මේ කතාවත් ගලාගෙන ගියා. වෙනසකට තිබුනෙ තමුන්ගෙ ව‍යාපාර දියුණු කරන්න කියලා තමුන්ගෙම ලී මෝලක් අරින්න යෝජනා කරපු සහ ඒක හොඳින් ක්‍රියාත්මක කරපු සමරවීරට පීටර් මුදලාලිගෙත් කැමැත්ත ලැබුණු එක විතරයි.

අවුරුද්දක් වගේ කාලයක් ගත වෙනකොට පීටර් මුදලාලිගෙ සම්පූර්ණ ආශිර්වාදය මත සමරවීර ටිම්බර් ස්ටෝර්ස් ආයතනයේ කළමණාකරු වෙච්ච සමරවීරගෙයි පීටර් මුදලාලිගෙ එකම දුවගෙයි විවාහය ඒ පළාතෙ ගොඩ දෙනෙක්ගෙ සහභාගීත්වයෙන් සිද්ධ වුණා. එදා ඉඳන් සමරවීර සියලුම ව‍යාපාර වල පාලකයා කරන්න වගේම ව‍යාපාර කටයුතු වලින් අයින් වෙලා නිස්කලංක ජීවිතයක් ගත කරන්නත් පීටර් මුදලාලි තීරණය කරේ ඔහු සමරවීර තුලින් දැකපු අවංක කම වගේම ඒ තමන්ගෙ එකම බෑණා නිසා. සමරවීර කාටත් හොඳින් සලකපු සේවකයො ගැන හොඳින් හොයා බලපු, ආඩම්බර කමක් නැති හාම්පුතෙක් වෙච්ච නිසා ව්‍යාපාරය බලාගෙන ඉඳිද්දි දියුණු උනා වගේම තමුන්ගෙ පවුලට හොඳ බෑණා කෙනෙක්, ස්වාමි පුරුෂයෙක් වෙන යුතුකමත් නොපිරිහෙලා ඉෂ්ට කරා.

මේ අතරෙ සමරවීර යුවල පුංචි පුතෙකුගෙ සුරතල් බලන්න වාසනාවන්ත වෙනවා. තමුන්ගෙ පළවෙනි මුණුපුරාව දැකපු පීටර් මුදලාලි ඒ සතුටින්ම තමුන්ගෙ සියලුම දේපල මුණුපුරාගෙ නමට පවරන්නෙ දෙපාරක් හිතන්නෙම නැතුව. කාලෙ ගත වෙනකොට පුංචි පුතා නිලන්ත ටිකින් ටික ලොකු වෙනවා. කොලඹ පිළිගත් පාසලකට ඇතුල් වෙන නිලන්ත තාත්තා වගේම ඉගෙනීමට දක්ෂකම් පෙන්නද්දි පීටර් මුදලාලිගෙ මරණින් පස්සෙ සමරවීර ඒ පළාතෙ නමගිය ව්‍යාපාර ගණනකම හිමි කරුවා වෙන එක ගැන කවුරුත් පුදුම නොවෙන්නෙ හැමෝම සමරවීරගෙ දක්ෂකම් අඳුනගෙන හිටියා වගේම කිසිම අසාධාරණ විදියකින් මුදල් හම්බ නොකළ කෙනෙක් බව කවුරුත් අත්දැකීමෙන්ම දැනගෙන හිටපු නිසා. නිලන්තට අවුරුදු 16 වෙනකොට සමරවීර මුදලාලි කියන්නෙ ලී ව‍යාපාර තුනක් වගේම ලංකාවෙ ප්‍රධාන පාරක් වුණු නුවර පාර අයිනෙ ඉන්ධන පිරවුම් හල් ගණනාවක අයිති කාරයෙක් වෙලා හිටපු ධනවත්, බලවත් වගේම කවුරුත් ආදරේ කරපු කෙනෙක් බවට පත් වෙලා හිටියෙ අවංක කම සහ කැපවීම නිසාමයි.

කාලෙ ගතවෙනකොට හොඳින් උසස් පෙළ සමත් වෙන නිලන්තව විදේශ උසස් අධ්‍යාපනයට යොමු කරන්න හැමදේම සූදානම් වුණා. ඒ සම්බන්ධ වැඩ වලට හැම තිස්සෙම කොලඹ යන මුදලාලිව වට පිටාවෙ කාටත් බොහොම පුරුදු දසුනක් වුණා. තවත් එක දවසකට ඉර උදා වුනේ ඒ දවස මොන වගේ දවසක් වෙයිද කියන එක කාටවත් හිතාගන්න බැරි සාමාන්‍ය දවසක් විදිහට. ඒත් ඒ දවස නිලන්තගෙ සහ මුළු සමරවීර පවුලෙම ඉරණම වෙනස් කරන දවසක් කියන දේ කවුරුත්ම දැනගෙන ඉන්න නැතුව ඇති. නිලන්ත විදෙස්ගත වෙන්න තිබුනෙ හරියටම සති දෙකක් වගේ කාලයක්. ඒ සඳහා මුදල් ගෙවන්න යන්න සමරවීර මුදලාලියි ඔහුගෙ බිරිඳයි බැංකුවට යන්නෙ නිලන්තට කොළඹ යන්න ලෑස්ති වෙන්න කියලා මතක් කරන ගමන්මයි. තමුන්ගෙ දෙමව්පියො එනකම් මග බලාගෙන නිවසට වෙලා ඉන්න නිලන්තට පැය දෙකක් ගත වෙනව දැනුනෙ හරියටම දවස් දෙකක් ගත වෙනව වගේ. තමුන්ගෙම නිවසේ සාමාජිකයෙක් වෙච්චි සහ ව්‍යාපාර වලදි සමරවීරට උදව් කරපු සෝමරත්න මාම එක්ක නිලන්ත දෙමව්පියන්ගෙ පමාව ගැන මැසිවිලි නගපු වාර ගනන අතේ ඇඟිලි ගානට වැඩි උනා මිසක් අඩු උණේ නැහැ. මුදලාලිත් ඔහුගෙ බිරිඳත් පිටත් වෙලා පැය තුනක් වගේ යනකොට පොලිස් ජීප් රථය සමරවීර නිවස ඉස්සරහ නැවැත්තුව  හැටි දැකපු නිලන්තගෙ හිතට මහ මූසල හැඟීමක් ආවා.

Tuesday, February 7, 2012

තවත් එක් මානවකයෙක්.

වැඩ නිසා බ්ලොග් එක පැත්තෙ එන්න හිතෙන්නෙත් නෑ වෙලාවකට. ඒත් වැඩක් පටන් ගත්තම මග නතර කරන්න හොඳ නෑ කියනවනෙ, ඒක නිසා පොඩි උත්සාහයක් ගන්නවා කතන්දරයක් වගේ එකක් ලියන්න. හිමින් ලියන නිසා එක කොටසක් එච්චර දිග වෙන එකක් නෑ. ඕගොල්ලන්ගෙ අදහස් ගොඩක්ම වටිනවා මේක ලියවෙන විදිහ ගැන.

වෙලාව උදේ 7.30ට විතර ඇති. වාහනේ එලවන්න තිබුණු කම්මැලි කම නිසා බස් එකකින් කොලඹ යන්න නිට්ටඹුව නුවර පාරෙ තිබුණු බස් නැවතුම්පලට ආවත් එන හැම බස් එකකම සෙනග ඉතිරිලා ගිහින්. කම්මැලි කම පැත්තක දාල කාර් එකේ ආවනම් මෙලහට කිලෝමීටර් ගානක් ගිහිනුත් ඉවරයි නේද කියල නිලන්තට හිතුනා.

නිලන්ත සමරවීර, එක්තරා සාමාන‍ය පන්තියෙ කොල්ලෙක් කියල දකින කාටත් හිතෙන ජාතියෙ චරිතයක්. පදිංචිය නිට්ටඹුවෙ. වයස අවුරුදු 25-26ක් තරම්. පවුලෙ තමන්ගෙම කියල කවුරුත් නැති වෙන්නෙ නිලන්තට වයස අවුරුදු 18දි. ඒක වෙන්නෙ මෙහෙමයි…………

සමරවීර මුදලාලි කියන්නෙ පස්යාල කියන පැත්තෙ සාර්ථකම ලී වෙලඳාම අයිතිව තිබුණු කෙනා. මුදලාලිගෙ පවුලෙ හිටියෙ එයාගෙ බිරිඳයි එකම පුතායි විතරයි. දෙහිඅත්තකණ්ඩියෙ ඉඳන් අවුරුදු විස්සකට විතර කලින් කොළඹ එන්න ඇවිත් මගදි හම්බු වුණු මනුස්සයෙක් නිසා ලී වාඩියක වැඩට ආපු දවස තමයි සමරවීරගෙ ජීවිතේ වෙනස් වෙන්න පාර කපපු දවස. වාඩියෙ වැඩ කරන සමරවීර උසස් පෙලත් සමත් වෙච්චි ඒත් තමුන්ගෙ වටපිටාව නිසා හරි හමන් තැනක් නොලැබුණු උත්සාහවන්ත තරුණයෙක් කියලා වාඩියෙ කවුරුත් කතා වුණා. මේ කතන්දර වාඩිය අයිති පීටර් මුදලාලිට ආරංචි වෙන්න වැඩි දවසක් ගියේ නැහැ.

සෝමරත්න තමයි බස් එකේදි තමුන්ට හම්බු වුණු කිසිම කපටි පෙනුමක් නොතිබුණු සමරවීර ගැන විස්තර අහල රස්සාවක් හොයාගෙන යන මේ තරුණයට තමුන්ට පුලුවන් විදිහෙන් උදව්වක් කරන්න හිතාගෙන පීටර් මුදලාලිට අඳුන්නල දුන්නෙ. පීටර් මුදලාලි සෝමරත්නගෙන් තවත් විස්තර විපරම් කරද්දි සමරවීර කියන්නෙ වාණිජ‍ අංශෙන් උසස් පෙල හොඳින්ම සමත් වෙච්චි කොල්ලෙක් කියන විස්තරේ දෙනගන්න ලැබෙන්නෙත් මේ දවස් වලදිමයි. විශ්වාසවන්ත සේවකයො නිසා ලේසියෙන් වාඩිය පැත්තට නොඑන පීටර් මුදලාලි එක දවසක් වාඩියට එනවා….

මුදලාලි - සෝමරත්න, අර සමරවීරට පොඩ්ඩක් එන්න කියන්න. මට මිනිහ එක්ක පොඩ්ඩක් කතා කරන්න ඕනෙ

තමුන්ට ජීවිතේ මුල්ම වරට ලැබුණු රස්සාවත් අහිමි වෙයිද කියන බයෙන් මුදලාලි ඉස්සරහට එන සමරවීරට ජීවිතේ කවදාවත් නොහිතපු විදියෙ කතාවක් මුදලාලිගෙ කටින් අහන්න ලැබෙනවා..

මුදලාලි - මට දැනගන්න ලැබුනා ඔය ළමයා හොඳ උගත් දරුවෙක් කියලා. මගෙන් ලී ගන්න ලොකු කඩ බොහොමයක් තියෙනවා. ඔය ලියුං  කියුං   වැඩ ටික මට තනියම කරගන්නත් අමාරුයි, ගිණුම් පැත්ත ගැන දැනුමක් තියෙන නිසා සමරවීරට බැරි වෙන එකක් නෑ මට උදව් වෙන්න ඒ පැත්තෙන්. උගත් කමකුත් තියාගෙන මොකට මේ වාඩියට ඕව දිය කරල අරිනවද??

එදා තමයි සමරවීරට තමුන්ගෙ ගැන ආඩම්බර හිතුණු එකම දවස. මේ තරම් කාලයක් කවුරුත් තමුන්ගෙ දැනුම අගය නොකරත් මේ මනුස්සය එහෙම කළ එක ගැන සතුටින් ඉපිලෙන ගමන් සමරවීර මුදලාලිගෙ යෝජනාවට උඩින්ම කැමති වුණා.


ඊට පස්සෙ වුණු දේ ඊලග කොටසින් බලාපොරොත්තු වෙන්න හරිය...